开心美文网 - 用文字分享心情! 文学爱好者交流群

开心美文网

不够格,先服软

作者:果果 来源:开心美文网 时间:2015-11-22 阅读: 在线投稿
虽然我瘦弱到好似火柴人咁,但我其实曾经学过几年跆拳道,一向都对武术好感兴趣。
 
早几日试玩左巴西柔术,做完热身运动,教练第一样教我嘅,唔系任何技术,而系教我投降。教练同我讲,唔好逞强,唔好怕输,当身体承受唔到就要投降,如果唔系只会整伤自己,无论你识几多技术都发挥唔到。
 
呢件事令我谂起几年前我喺一场跆拳道比赛惨败嘅经过。
 
当日我嘅对手系一个高我成个头嘅红黑带选手,而当时我只不过岩岩升左绿蓝带,虽然色带唔代表一切,我自己都曾经喺公开赛打赢过两个红黑带嘅对手捧过盃,但始终色带级数嘅差距都会令我有压力。而我因为放暑假太得閒而操练过度,拉伤左大腿,加上我见佢手长脚长,以拳脚距离嚟讲,佢的确系佔有优势,各样因素加起上嚟,令我未上场已经好紧张。
 
而正如我所料,对手见我比佢矮,佢不断搵机会Cut Down我(因打身得1分,中头得2分),终于有一下佢Cut Down时我步法乱左,向后退得唔够快,畀佢一脚踢中左个鼻,但当时我甚至感受唔到痛唔痛,只系马上企起身,想继续比赛。
 
但呢个时候,我见到我嘅教练掉左条白毛巾出嚟──佢示意我投降。嗰一刻我喺心度问,点解要投降呀?我仲可以打㗎!但几秒之后,我终于知道点解,因为我见到自己成身都系血。
 
原来我已经畀佢踢到流鼻血,想像一下我著住一身白袍,上面由心口到条裤都系鲜红嘅血,我就好似车祸现场嘅伤者一样,系咪好有画面呢?我到今时今日都唔明白,点解咁细个鼻,可以流出咁多嘅血……
 
返到屋企,我为免屋企人担心,所以唔敢将件袍摆落洗衣篮,只可以喺水龙头下用番枧一下一下咁擦走啲乾涸左嘅血迹。经过左呢件事,我以大腿受伤为由,慢慢减少左去练习,后来仲停学埋。其实我心底明白,我系因为恐惧失败而放弃左呢样运动,我嘅记忆一直都定格喺自己成身血嘅嗰一秒,所以我一直都无办法走出呢个阴影。
 
其实教练讲得岩,唔好逞强,唔好怕输,尽左力比赛,投降其实并唔可耻。
 
未有资格赢之前,我的都应该学识点样输。
开心美文网www.kxmw.com,原创短篇经典美文优美文章散文精选在线阅读欣赏。
分享到:
------分隔线----------------------------

相关阅读

发表文章
发表评论
严禁发布色情、暴力、反动的言论。(温馨提示:无需注册登录也能发表评论哦!)
昵称: 验证码: 点击我更换图片
最新评论 查看全部评论>>

深度阅读